РУСКИ КЕРЕСТУР – Дакедишнї Австралиянєц, од нєдавна знова Рускокерестурец Звонко Гайдук, туристично будзе лєциц на воєним млазним авионє над цалу Сербию, а окремну увагу пошвеци родному Керестуру, до хторого ше нєдавно врацел занавше, после 47 рокох роботи у далєкей Австралиї. Тото интересантне збуванє будзе у єдним дню – медзи 11. и 16. септембром, найвироятнєйше нєшка, 11. септембра, а шицко завиши од розпорядкох лєценя у Войску Сербиї.
На тим лєценю з Гайдуком будзе и єден з найискуснєйших воєних пилотох Войска Сербиї, а з авионом буду пилотировац обидвоме, на змену. Як плановане, драгу почню з Беоґраду, облєца коло гранїцох Сербиї, нащивя Ченей, та Керестур, окаль пойду на Златибор и Копаоник, а нє виключена ище даєдна дестинация.
– Воєни млазни авион штреднє швидко лєци 700 до 900 километри на годзину, а висину будземе прилагодзовац спрам можлївосцох и потребох, односно од того цо пожадам видзиц. За тераз нє плануєм на тим подняцу правиц видео и фото-знїмки, будзем лєциц за свою душу – гварел Гайдук.
Гоч є нє пилот по фаху, Гайдук за собу ма вельке пилотске искуство, а над Сербию подобно уж лєцел вецей раз, остатнїраз пред шейсцома роками. Родни валал надлєцел и знїмал пред дзешец роками.