КУЛА – Як пред нєшкайшим Саймом за обезпечованє роботи у Кули наявел предсидатель Скупштини општини (СО) Кула Велибор Милоїчич, италиянскей компаниї за продукцию споднїх шматох „Ферано”, хтора будзе будовац свой продукцийни погон у Кули, потребни 200 роботнїки.
– Идуцого тижня, 6. юния, будзе лицитованє за предаванє двох гектарох жеми у Индустрийней зони у Кули и праве компания „Ферано” уплацела депозит 20 одсто, так же и на їх вимогу, пре потребу за роботнїками, орґанизуєме нєшкайши Саям обезпечованя роботи – гварел за „Ку-медия” Милоїчич.
Попри спомнутей компаниї, на Сайме вимоги за занятима понукню ище коло петнац заинтересовани роботодавателє, так же потребни коло 300 роботнїки рижних профилох, як цо то вожаче, будовательни роботнїки, скравци, шивачки и други, гварел предсидатель СО Кула пред Саймом.
Нєшкайши Саям обезпечованя роботи у Кули будзе у сали Мадярского културного центру „Непкер” од 11 до 13 годзин.
Нєзаняти особи з местох кулскей општини на Саям можу пойсц безплатно на порядних автобусних линийох, за цо треба указац белави евиденцийни картон з Националней служби за обезпечованє роботи.
З Руского Керестура на Саям годно пойсц на автобусу хтори до Кули идзе на 9,40 годзин з Авобускей станїци.
Саям орґанизує кулске оддзелєнє зомборскей филияли Националней служби за обезпечованє роботи, у сотруднїцтве з локалну самоуправу.
