КОЦУР – З кладзеньом венцох на памятнїк погинутим борцом НОВ на площи опрез ОШ „Братство єдинство” у Коцуре вчера, 19. октобра, Месна орґанизация Здруженя борцох НОВ Коцура означела Дзень ошлєбодзеня места у Другей шветовей войни.
З тей нагоди отримана и кратка програма, а шветочносц зоз своїм присуством возвелїчал предсидатель Комунистичней партиї и унук Йосипа Броза Тита – Йошка Броз.
Спред Месней орґанизациї Здруженя борцох НОВ присутних привитала Мария Дудаш, а потим венци положели Йошка Броз, представителє Општини Вербас, на чолє з предсидательку Скупштини општини Вербас Марияну Мараш, представителє Месней заєднїци Коцур, Општинскей орґанизациї СУБНОР Вербас, Месней орґанизациї Здруженя борцох, политичних странкох, коцурских КУД-ох, Активу женох и огньогасцох.
З минуту цихосци дата почесц погинутим борцом и пречитани їх мена, а як знак здогадованя на нїх оглашела ше и сирена. Весна Радошевич Пешут и Мария Горняк пречитали по єдну писню, а у програми з рецитациями участвовали и школяре ОШ „Братство єдинство”, котрих пририхтала Снежана Шанта.
На памятнїку у центре Коцура виписани мена 55 борцох котри страдали у Другей шветовей войни, як и три мена борцох котри страдали у войнових зраженьох у бувшей Югославиї од 1991. по 1999. рок.