КОЦУР – У Малей сали Месней заєднїци у Коцуре, вчера, 22. марца, Каритас орґанизовал округли стол о зменшованю ризику од природних нєпогодох, на хторим зведзени резултати поробеного и винєшени идеї за дальши активносци на основи проєкту о зменшованя ризику од природних катастрофох, хтори Каритас запровадзує у Коцуре.
На округлим столє присуствовали представителє Месней заєднїци Коцур, Здруженя пензионерох, директорка ОШ „Братство-єдинство“ Славица Байор, представителька шестрох Служебнїцох ш. Михаила Воротняк, представителє Здруженя младих КУМ з Коцура, та ЯЗИП-у и Еколоґийного руху з Вербасу.
Попри велїх предкладаньох и идейох же на яки способи мож зменшац ризик од нєпогодох и катастрофох у, и коло Коцура, на сходзе представени и план активносцох за наиходзаци период, у хторим предвидзене предлужованє садзеня древкох за витрозащитни пас на териториї вербаскей општини, та правенє беґельскей мрежи за одвод атмосферских и поджемних водох.
Поведзене и же треба оправиц ограду и приход коло школского двора, понеже ше находзи у благей депресиї, та ше ту збераю атмосферски води.
Спред Каритасу на схадзки були и вивершни директор Каритасу Апостолского еґзархату Янко Катона, координатор проєкту за зменшованє ризику од природних катастрофох Елемир Джуджар и фахова сотруднїца на тим проєкту Йована Лончаревич.