БЕОҐРАД – Директорка Канцелариї за людски и меншински права Сузана Паунович вчера шицким женом повинчовала 8. марец, Медзинародни дзень женох и поручела же важне отворено бешедовац о правох женох и проблемох з котрима ше зочую.
– Таки щири диялоґ приводзи по пренаходзеня найлєпших ришеньох за унапредзенє положеня женох и обовязкох держави, алє и вкупного дружтва – гварела Сузана Паунович, а сообщене з Канцелариї за людски и меншински права.
Вона додала же за остатнї даскельо роки досц зробене на звекшаню заступеносци женох у орґанох явней власци. Жени творя 62,24 одсто цалосного числа державних службенїкох, на руководзацих вивершних местох 53,23 одсто жени, а 45 одсто роботни места припадаю женом котри на положеню.
Треба ище досц робиц же би ше звекшало число женох у єдинкох локалней самоуправи, насампредз женох котри приноша одлуки важни за локалну заєднїцу, наводзи ше у сообщеню.
И Женска парламентарна мрежа вчера здогадла на шицки жени котри охабели глїбоки шлїд у историї , алє и же о правох женох у Сербиї треба бешедовац кажди дзень, а нє лєм 8. марца.