Слуп очуваня идентитета

автор мартица тамаш
733 Опатрене

 

Медзинародни дзень людских правох 10. децембeр, хтори означени з манифестацию – „Зложни мозаїк Сербиї” пренєсол порученє зоз Сербиї до швета же єй барз важни: медзисобне порозуменє, толеранция и почитованє. Канцелария за людски и меншински права Влади Републики Сербиї саям орґанизовала други рок за шором, а єй директорка Сузана Паунович на отвераню визначела же Сербия пошвецена запровадзованю Акцийного плану за поглавє 23 и обовязкох хтори з нього виходза, як и Акцийного плана за витворйованє правох националних меншинох.

З тим у вязи и нєдавне активованє Буджетского фонду за национални меншини, до хторого под час новембра зоз вецей проєктами конкуровали нашо руски институциї и здруженя, и тих дньох подписани контракт за реализацию проєкта: Портал Визначни Руснаци.

Очуванє националного идентитету, власного язика и култури, єдно з основних людских правох, та ше на Беоґрадским сайме зоз свою културу, насампредз традицийним фолклором и шпиваньом, народним облєчивом и ґастрономию, алє и новинску и видавательну дїялносцу представели 14 национални меншини, медзи хторима и ми Руснаци.

Барз хасновите було видзиц як други национални заєднїци робя и кельо су успишни у очуваню своєй националней окремносци и богатства култури; и поучне, бо успишни програми даєдних малочислених националних заєднїцох указали же пошвецено и континуовано роби и же їх национална свидомосц на високим уровню.

Зоз фолклором, инструменталну музику и шпиваньом представел ше Дом култури Руски Керестур, зоз ручнима роботами, сувенирами и традицийним руским роботним облєчивом керестурске Здруженє женох „Байка”, хторе порихтало и традицийни єдла, зоз вином АД „Руски двор” зоз Шиду, зоз новинску и видавательну дїялносцу НВУ „Руске слово” и Завод за културу войводянских Руснацох.

Нашо представянє указало же знаме чувац свойо – свой язик, културу и традицию  и же информованє и видавательна дїялносц на нашим язику вецей од информованя и литератури, вони нам националним меншином, основне людске право и слуп очуваня идентитета.

ПОВЯЗАНИ ТЕКСТИ