Сухи роки и тропски лєта вше частейши, так повесц, постали нормалне зявенє, з рока на рок людзе ше звикли, алє польодїлски култури нє и прето церпя урожаї зоз польох. Праве и того року то будзе причина за озбильни утрати на урожайох польодїлских, овоцарских и заградкарских културох. Парасти ше зоз правом уж тераз питаю и нагадую же яки будзе урожай, и чи цена зарна будзе у складзе зоз укладанями.
Вода єден зоз найважнєйших условийох за сиґурну продукцию, а наводньованє зоз можлївосци тераз постало нужна потреба. Праве прето субвенциї за укладанє до залївних системох окреме значни, и требало би же би були доступни шицким.
Кед слово о конкретней потримовки инвестицийом до залївних системох, то и конкурс котри каждого року розписує Покраїнски секретарият за польопривреду, водопривреду и лєсарство. Того року на тим конкурсу розподзелєни 480 милиони динари, приявени були 792 проєкти, а средства достали лєм 331. Пред роком, 2025. тот конкурс мал буджет 450 милиони, од 798 приявох, средства були опредзелєни за 459. Пред двома роками, 2024. буджет того конкурсу бул 350 милиони динари, було 854 прияви, а средства достали лєм 294. Же часи скорей були лєпши, и же потримовка була векша, односно облапяла широки круги польопривреднїкох, потвердзую резултати истого конкурсу зоз 2023. року, теди ше розподзелєло 464 милиони динари на 465 прияви, а було их 1.165. Истого року, буджет конкурсу бул вельо менши, медзитим, понеже на конкурс сцигли вецей як тисяч прияви, Влада АП Войводини звекшала средства. И роками пред тим ситуация була подобна, углавним на конкурс ше приявйовали скоро шицки цо инвестовали до залївних системох, потримовка була велька. Углавним, гоч буджет бул менши од буджету яки є того року, вецей прияви доставали средства за проєкти малих польопривредних ґаздовствох. Милионски субвенциї були права ридкосц, цалком иншак як цо то случай того року.
Евидентне и же покраїнски конкурс постал менєй популарни и прицагуюци малим парастом. З рока на рок єст вше вецей заградкарох котри одустали од таких субвенцийох, насампредз прето же дзепоєдним компликована процедура конкурованя, старшим очежано назберац достаточне число бодох, з єдним словом то нє так як було скорей же ше позбера пейц-шейсц папери, пополнї формулар и пошлє по пошти.
Малим польопривредним продуковательом наводньованє наисце барз значи, залївна система постала нужда, а потримовка таким инвестицийом часто нєдолаплїва.