НОВИ САД – З нагоди Шветового дня правох трошительох, хтори ше означує 15. марца, поведзене же од септембра 2014. року у Сербиї важи нови закон о защити трошительох, з хторим трошительни орґанизациї достали векши права и можлївосци порушованя мирох забрани и заступаня интересох трошительох, як и указованя на нєчесну дїловну праксу.
Трошитель обчекує же роба хтору купує ма з декларацию ґарантовани квалитет, алє искуство гутори же у тим трошителє часто наиходза на нєчесну дїловну праксу.
Хлєб, млєко, йоґурт и други поживово артикли людзе каждодньово купую, а вше векше число трошительох меркує и чита цо написане на декларацийох тих продуктох.
Правилнїк о декларованю, означованю и рекламованю поживи єден з велїх усоглашених правилнїкох з ЕУ и по словох Асоцияциї трошительох Сербиї, його дошлїдне применьованє ма вельке значенє за купцох.
З применьованьом того правилнїка купец чежко будзе зспреведзени у поглядзе состойкох, лєбо прикметох поживи хтору купує. На декларацийох тераз, окрем того цо звичайно важне трошительом – назва продукту, час тирваня, список состойкох, лєбо їх количество, тиж ясно муши буц назначене место походзеня продукту, як и катеґория квалитету поживи, лєбо класа поживи.
З Асоцияциї трошительох совитую же би купци мали звикнуце читац декларациї, и кед обача нєправилносци, най их приявя компетентним инспекцийом.