Униформу дзеци ноша дзечнє

автор мар
1.3k Опатрене

У керестурскей школи од початку нового школского року школяре основней школи облєчени у каменкових маїцох – школских униформох, направена нова компютеризована учальня за потреби шицких школярох. Пре нєдостаток кадру, школяре од пиятей по осму класу нє маю наставу з нємецкого язика.

Ище вше тирва преписованє школярох першей класи штреднєй школи зоз школи до школи, и менянє напрямох по самих школох. Тераз пополнєте вецей од половки капацитету школярского дому. У школским  дворе и цалим будинку препознатлїви шицки школяре, понеже ноша каменково маїци зоз школским лоґом. Реакциї и думаня о нових униформох, т. є. маїцох подзелєни. Векшина дзецох их ноши дзечнє, а тих дньох достали и по другу маїцу. Обидва маїци финансовали родичи самостойно.

– За униформи ше опредзелєли родичи на Совиту родичох, а на исти способ и вибрани випатрунок униформох, котри нє буду вельке обтерхованє за родичох – гварела директорка Школи Хелена Пашо Павлович.

НОВА КОМПЮТЕРИЗОВАНА УЧАЛЬНЯ

Зоз средствох локалней самоуправи простория роботнї котра була часц кабинету за Технїчне образованє обновена и присподобена до меншей компютеризованей учальнї, а наменєна є за потреби шицких школярох.

 У наставней програми од пиятей по осму класу єст и нємецки язик, но пре нєдостаток кадру у школи, и почежкосци при пренаходзеню потенциялних викладачох, ище вше нє отримана анї єдна годзина нємецкого язика. Консултуюци школского инспектора, принєшена одлука же нє мож пременїц предмет нємцкого язика за русийски, понеже уж шицки школяре маю учебнїки, та и причину же го учели од пиятей класи.

– Наставнїк котри викладал нємецки язик прешол на друге роботне место, так зме од авґуста глєдали дакого хто би могол присц викладац, алє зме нє нашли. На лїстини нєзанятих при Служби за обезпечованє роботи нєт нїкого у ширшей околини, брали зме до огляду и студентох котри нє закончели студиї, алє нєт заинтересованих – дознаваме од директорки Пашо Павлович, та додава же за тот мешац пренашли ришенє, так же пополаднями будзе приходзиц наставнїк котри викладал и дотераз, а од октобра рахую же буду мац тирвацше ришенє.

ИЩЕ НЄ КОНЄЧНЕ ЧИСЛО ШКОЛЯРОХ У ПЕРШИХ КЛАСОХ ШТРЕДНЄЙ ШКОЛИ

У шицких штреднїх школох, та и у рускокерестурскей тирва премесцанє школярох, з оддзелєня до оддзелєня, та и зоз школи до школи. У першей класи ґимназиї з руским наставним язиком була уписана и єдна школярка котра нє знала по руски, а понеже ше ошлєбодзело єдно место у сербским оддзелєню, тераз є преписана там. На подобни способ ше премесцаю и школяре з єдней до другей школи, та ше виписую и уписую школяре до оддзелєня напряму туристичного технїчара и оддзелєня ґимназиї зоз сербским наставним язиком. Мож обчековац же обидва оддзелєня зоз сербским наставним язиком буду пополнєти, понеже кед ше дахто випише, такох ше упише нови школяр. Затераз нє пришол анї єден нови школяр до руского оддзелєня ґимназиї, алє єст родичох и потенциялних школярох котри ше розпитую за таку можлївосц. Познате же преписованє интензивне по децембер, а часто ше то случує и початком другого полроча. У руским оддзелєню ґимназиї тераз єст 17 школярох, а пополнєти 19 места, понеже єдна школярка уписана по Индивидуалней образовней програми (ИОП).

Як приходзи до пременкох у перших класох, так ше меня и число змесцених у школярским доме – интернату, прето же вецей од половки змесцених школярох уписани до першей класи. Тераз у интернату змесцени 46-еро школяре розпоредзени у трох воспитних ґрупох, а його капацитет 70 места. Обчекує ше звекшанє того числа, по спатраню на скорейши роки, вше єст вецей школярох уписаних пред жиму, котри керую путованє.

skoljariki 003

ПОВЯЗАНИ ТЕКСТИ