У церкви заменєни радиятори

автор маф
945 Опатрене

КУЛА – У парохийней церкви священомученїка Йосафата у Кули тих дньох заменєни радиятори на централне зогриванє, а то єдна з перших роботох нового составу Церковного одбору хтори вибрани початком мая.

Як дознаваме од економа одбору Елемира Мудрия и капелана кулскей парохиї о. Платона Салака ЧСВВ, ремонт зогриваня поробени прето же ше указала потреба, понеже централне зогриванє у тей нашей церкви уведзене ище 1998. року, а ремонтоване є на даскельо заводи.

Прето же нови радиятори поставени на бочних мурох церкви, а нє у облакох дзе були потерашнї, коло лавкох и мура остал узки преход, та ше будзе мушиц поцаговац лавки ґу штредку церкви и патос под нїма, цо будзе дакус векша робота и инвестиция.

Попри тей роботи у кулскей парохиї, по словох о. Платона ЧСВВ пред новим Одбором будзе векше подняце – санация стрехи на церкви дзе поставена турня понеже там премака, а рихтаю ше обновиц и криж на теметове.

ПОВЯЗАНИ ТЕКСТИ