БЕОҐРАД – По найновших податкох, у Сербиї єст коло 754 000 нєзанятих, медзи нїма 26 одсто млади, котрим треба обезпечиц роботу же би нє одходзели до иножемства, гварел министер за роботу, обезпечованє роботи, борецки и социялни питаня Александар Вулин.
Прешлого тижня министер Вулин и министер младежи и спорту Ваня Удовичич нащивели авио-компанию „Ер Сербия“ и наявели проєкт обезпечованя роботи за младих и творенє условийох же би млади оставали жиц и робиц у Сербиї.
У рамикох проєкту ше през виглєдованя и бешеду з руководительствами вельких компанийох у Сербиї пробує утвердзиц проблеми и методи хтори допринєшу звекшаню роботних местох за младих. Министер Вулин гварел же у „Ер Сербиї“ прешлого року 700 млади достали роботу, та прето перше нащивели тоту компанию, а у наиходзацим периодзе ше будзе глєдац потримовка и других компанийох.