ҐОСПОДЇНЦИ – У просторийох Месней заєднїци Ґосподїнци вчера, пияти раз по шоре, отримана шветочносц з нагоди Националного швета Руснацох у Републики Сербиї.
После гимни Републики Сербиї и шветочней шпиванки Руснацох у Сербиї, присутних привитал Микола Кухар, координатор Подручней канцелариї у Дюрдьове котра помага орґанизацию означованя того швета у Ґосподїнцох. Швето присутним винчовали и Борислав Сакач, предсидатель Националного совиту Руснацох и Ґоран Миланович член Совиту МЗ Ґосподїнци.
У шветочней програми участвовали члени рецитаторскей секциї дюрдьовского КУД „Тарас Шевченко” з Дюрдьова котри пречитали писнї дюрдьовских писательох. Свою нову писню пречитал Владимир Кочиш, а о историї Руснацох и їх пребуваню на тих просторох пречитала Наташа Хромиш (Чапко) зоз дюрдьовского Дружтва. Потим школяре нїзших класох валалскей ОШ котри виучую руски язик вєдно пречитали виривок зоз Идилского венцу „З мойого валала” Гавриїла Костельника.
На програми були и Миломир Шайтош, предсидатель УО Заводу за културу войводянских Руснацох, Дарко Вранешевич, директор валалскей Основней школи „Жарко Зренянин”, члени Церковного одбору грекокатолїцекй церкви у Ґосподїнцох, члени УО КУД „Тарас Шевченко”и други валачанє.
Програму з нагоди швета Руснацох у Ґосподїнцох пририхтала Подручна канцелария Националного совиту Руснацох зоз шедзиском у Дюрдьове и у сотруднїцтве з Руснацами зоз Ґосподїнцох.