БЕОҐРАД – Обласц шлєбодного приступу информацийом од явного значеня у Сербиї барз добре функционує и у вельким проценту ше почитує закон, алє у защити особних податкох треба ище вельо робиц, заключене на Скупштинским одборе за людски и меншински права и ровоправносц полох.
Поверенїк за информациї од явного значеня и защиту податкох о особи Родолюб Шабич визначел же од кеди ше почало запровадзовац Закон о шлєбодним приступу информацийом од явного значеня єст вецей вимоги за интервенцию Поверенїка, а налоги Поверенїка ше почитує у 96 одсто случайох.
Постоя два механїзми хтори примушую дакого же би дал информацию од явного значеня – з пенєжну кару, лєбо з интервенцию Влади Сербиї. Шабич гварел же явни подприємства за нєдаванє информацийох лєгко плаца пенали, понеже нє плаца зоз своєй кишенки, алє з явного пенєжу, и наведол же єдно явне подприємство 2015. року плацело аж штири милиони динари прето же нє сцело дац информацию.
Поверенїк оценєл же Влада Сербиї у велїх случайох нє интервенує, та би о тим розправяц у републичним парламенту.
Стан у обласци защити податкох о особи зложенши, та 2009. року, кеди принєшени Закон, Поверенїк достал 80 жалби, а 2015. року ше тото число звекшало на 2 500. Шабич гварел же ше аж и державни орґани поносую єдни на других, та дотераз од нїх достал вецей як 100 жалби.
Шабич визначел же треба направиц нову стратеґию и акцийни план и принєсц нови закон о защити податкох о особи, понеже актуални ма вельо хиби и нє у складзе є з Уставом Сербиї.