БИКИЧ – У Доме култури вчера вечар, 16. януара, означене Националне швето Руснацох у Републики Сербиї з пригодну програму хтори порихтали члени КПД „Иван Котляревски“.
Програма почала з наступом Шпивацкей ґрупи „Бикичанки“ зоз шпиванку Михайла Ковача „Хижочко стара“ и Шветочну шпиванку дружтва „Як вода в поточку“.
„Бикичанки “ ше у програми представели и зоз штирома колядами, а Деян Бобаль, Марина Шолтис и Зденко Лазор здогадли на историйни факти о насельованю Руснацох на подруче нєшкайшей Войводини, а потим и до Бикичу и вязами зоз старим крайом.
Зденко Лазор, член Националного совиту Руснацох у свойо и у мено Националного совиту шицким повинчовал тото швето.
После програми друженє предлужене на коктелу, а окрем домашнїх, на преслави були и госци зоз Шиду, Беркасова и Бачинцох.
