КОЦУР/ДЮРДЬОВ – Як пише портал „Дневнику”, Пошта Сербиї у 40 местох южнобачкого округу будзе мац и меняльнї девизох. Таки меняльнї буду и у Пошти у Коцуре и Дюрдьове, наводзи „Дневник”, а потвердзую дописователє Рутенпресу.
На Пошти у Коцуре мєнялньня почала робиц позавчером, 29. юния, а провизию ше нє наплацує. У тим месце єдино ту мож заменїц девизи за динари и наспак, а до банки Коцурци муша пойсц до Вербасу.
Купованє и предаванє девизох на Пошти у Дюрдьове з роботу почнє тих дньох, гоч то, як дознава Рутенпрес, тиж мало почац 29. юния. У Дюрдьове тиж нєт анї єдней банки, а у першей змени, як и Пошта, роби лєм єдна приватна меняльня. Дюрдьовчаном найблїзши банки у Жаблю и Шайкашу, хтори тиж робя єднократно.
Як за „Дневник” гварел директор Роботней єдинки Пошти Сербиї Нови Сад Драґан Йоканич, тераз у 33-ох местох южнобачкого округу на Пошти єст и меняльнї, а пошвидко буду робиц ище у седем местох.
За тоту дополнююцу роботу нє анґажовани нови роботнїки, алє ю окончую постояци, а попри меняльнї, Пошта пошвидко планує отвориц и електронски тарґовини.
(На фотоґрафийох Пошта у Коцуре и Дюрдьове).
