БЕОҐРАД – Вчера подписани анекс основного контракту за вибудов Жежельового моста, зоз хторим обезпечени коло три милиони еври за предлужованє роботох на вибудови того моста. Од того два милиони еври обезпечела Автономна Покраїна Войводина, а милион еври Город Нови Сад. По новим документу предвидзене же би мост бул закончени за 17 мешаци.
Анекс контракту подписали представителє финансиєрох-предсидатель Покраїнскей влади Боян Пайтич и городоначалнїк Нового Саду Милош Вучевич, инвеститора-ґенерални директор „Желєзнїцох Сербиї“ Мирослав Стойчин, та представитель шпанско-италиянского конзорциюма хтори будує мост Алехандро Серано.
На подписованю документу присуствовали представителє Влади Сербиї и Европскей униї (ЕУ), а з тей нагоди амбасадор ЕУ Майкл Девенпорт гварел же, гоч вони нє подписнїки контракту, за вибудов Жежельового моста видвоєли безповратни средства од 30 милиони еври, та и за нїх значне же би ше тот мост конєчно вибудовало. Вон наявел же, док будзе вибудовани мост, ЕУ видвої ище штири милиони еври за приступни драги.