НОВИ САД – Министерство образованя Републики Сербиї 1. септембра розписало конкурс за студентох хтори под час студираня жадаю бивац у студентских домох.
За студентох першого року конкурс отворени од 1. до 15. септембра, а за старших до 31. октобра. Понеже процедура за конкурованє до студентских домох вимага вельо шлєбодного часу, як и же би студентом олєгчал конченє, чеканє у шоре за придаванє потребней документациї и плаценє потребних рахункох програмер, Александар Бесерминї, обдумал мобилну апликацию под назву Монитор шора:
– Монитор шора помага студентом хтори пришли до шалтер сали придац документацию лєбо плациц рахунки. Кед студенти вежню свойо шорни числа, прейґ сайта лєбо на мудрим телефону мож провадзиц хторе число преволане на шалтеру служби, та так студенти можу на вельо квалитетнєйши способ розполагац зоз своїм часом и вельочисленима обовязками.