У шицких штирох основних школох у Општини Жабель школяре перших класох достали жовти хусточки и флуоресцентни брушлїки же би були видлївши, та и защиценши на драги до школи. Опрему достали од Општини, а о єй намени бешедовали милиционере з општинскей станїци.
Концом септембра и першокласнїки ОШ „Йован Йованович Змай” у Дюрдьове мали нагоду побешедовац зоз милиционерами як ше треба справовац кед участвую у транспорту – о основних транспортних предписаньох, о школярох як активних учашнїкох у транспорту, значносци познаня транспортней култури за безпечнєйше участвованє у транспорту, цо добре, а цо нє добре у тих ситуацийох.
Окреме предочене же зоз искуства познате же наймладши школяре возбудзени на початку школского рока и же прето треба змоцнїц безпечносц при школи. Милиционере визначели и же достати хусточки и брушлїки першокласнїком буду на хасен и звонка школи, та би их требали ношиц и док буду вожиц бициґлу, тротинет, ролери, алє и док буду шейтац. Теди буду обачлївши вожачом у транспортних превозкох, окреме у тим периодзе кед сезона роботох на полю и кед на улїцох у цалей Општини динамични транспорт.
Опрему у шицких штирох местох Општини подзелєл Лазар Чонкич, член Општинскей ради задлужени за образованє, науку и младеж Општини Жабель.