Наша „Маруся” – вше на „бис”

автор дюл
1.5k Опатрене

Фестивал „Лемковска ватра”, котри орґанизує Здруженє Лемкох (Русинох) Польскей, oтримує ше каждого року на лєсовитим платоу. Ту ше зоз шицких крайох Польскей сходза Лемки-Русини до краю своїх предкох, зoз котрого су у 1947. року примушуюцо розселєни.

У дньох од 22. по 25. юлий того року у Польскей, нєдалєко од места Ждиня, одбул ше 34. Фестивал „Лемковска ватра”, котри орґанизує Здруженє Лемкох (Русинох) Польскей. Отримує ше каждого року на лєсовитим платоу, на 10 гектарох, чий ґрунтовни власнїк спомнуте здруженє. Ту ше зоз шицких крайох Польскей сходза Лемки-Русини до краю своїх предкох, з котрого су у 1947. року примушуюцо розселєни до сиверозаходних часцох польскей держави, зоз цильом же би там були дефинитивно асимиловани. А вони, нє лєм же нє асимиловани, алє ище и звекшали националне чувство у своїх потомкох, котри ше тераз сходза до краю дзе им коренї, же би ше окрипели и наполнєли з националним културним нашлїдством. Ту вони розпинаю свойо шатри, стретаю ше зоз своїма сонароднїками скоро з цалого швета и на тот способ змоцнюю свойо националне достоїнство.

Таки масовни сход, котри начишлює и даскельо дзешатки тисячи людзох, нє може прейсц и без пригодней културно-уметнїцкей програми розважного типа. За тоту файту програми специялно збудована лєтня сцена зоз помоцнима просториями за виводзачох, а приведзена и струя. Коло амфитеатра, у складзе з лєсовим амбиєнтом, збудовани културни, погосцительни и комерциялни будинки, у котрих нащивителє можу подмирйовац свойо поживово, санитарни и туристични потреби.

15 IMG_7359

Програма Фестивала почала пияток, 22. юлия, а предлужена всоботу, 23. юлия, з розпальованьом лоґорского огня, символа памятки на упокоєних предкох, и привитнима словами високих державних фунционерох Польскей, потим представнїкох українскей амбасади и домашнїх функционерох Здруженя Лемкох и Шветовей федераций українских лемковских орґанизацийох.

Од пиятку вечара, та по нєдзелю пред вечаром, на лєтнєй сцени „Лемковскей ватри” шоровали ше солисти и ансамбли зоз шицких крайох Польскей, та України, Словацкей, Горватскей и Сербиї. Значне ту спомнуц же Горватску представяли Руснаци зоз Петровцох и Миклошевцох, а Сербию аж три ансамбли: з Нового Орахова, Жаблю и Индїї, котрим орґанизатор нащиви бул Союз Руснацох Українцох Сербиї. Нашо три ансабли наступели и поєдинєчно и як заєднїцки хор. Публика з окремним зацикавеньом провадзела наступ наших аматерох (особлїво Петра Закамарока) и наградзела их  з одушевеним аплаузом. И всоботу и внєдзелю нашо три зєдинєни ансамбли були поволани на „бис” одшпивац популарну „Марусю”.

15 MikVATRI, 23.07, 2016

ПОВЯЗАНИ ТЕКСТИ