БАНСКА БИСТРИЦА (СЛОВАЦКА) – На урядовей шветочносци з нагоди Словацкого народного повстаня (СНП) у Другей шветовей войни, хтору ше кажди рок 29. авґуста орґанизує при памятнїку СНП у Банскей Бистрици, того року присуствовала и службена делеґация Русинох Словацкей, преноши lem.fm.
Як пише спомнути портал, од прешлого року на памятнїку СНП поставена и окремна табла же у повстаню процив фашизму и нємецкого окупатора, та нємецкей сателитскей держави на териториї тедишнєй Словацкей, вєдно з другима народами участвовали и Русини. На инициятиву русинского активисту Ивана Бандурича, памятна табла Русином открита 29. авґуста 2015. року и приключена є ґу таблом з менами других народох котри участвовали у повстаню.
Повстанє народох Словацкей, односно антифашистичного руху у Другей шветовей войни почало 29. авґуста 1944. року, з центром у Банскей Бистрици, нєм лєм процив окупацийскей армиї, алє и процив тедишнього авторитативного колаборацийного режиму предсидателя Словацкей Йозефа Тису.
Нємецка армия повстанїкох поражела вноци медзи 27. и 28. октобром 1944. року и вони прешли на партизански способ войованя, як ше потим борели по ошлєбодзенє 1945. року. Повстанє ма вельке историйне значенє за Словацку, понеже з нїм и дальшу борбу, Словацка була медзи державами-побиднїками у Другей шветовей войни, у чим участвовали и Русини.
Делеґация Русинох на тогорочней державней шветочносци на памятнїк при Музею СНП у Банскей Бистрици положела венєц з надписом „Русини 2016”, а у делеґациї бул и предсидатель Русинскей оброди Словацкей Мартин Караш, як найвекшей орґанизациї Русинох у Словацкей.