БЕОҐРАД – Републични фонд за здравствене осиґуранє (РФЗО) спозорює же до конца того рока паперово треба заменїц за електронски здравствени карточки. Медзитим, з Фонду сообщели же и после того датума нїхто нє останє без здравственей услуги, бо паперово карточки буду важиц покля су оверени.
Законски термин за замену почал 1. януара 2015., а закончує ше 31. децембра того року. Чиповани електронски карточки тераз ма трецина осиґураних гражданох, спомедзи котрих векшина заняти, бо их доставали прейґ подприємствох и компанийох дзе су заняти.
Виробок електронскей карточки кошта 400 динари, а плаци их осиґуранїк, за даєдних и роботодаватель.
Социялно загроженим катеґорийом и новонародзеним дзецом виробени персонализовани карточки, хтори буду донировани и дзецом з почежкосцами у розвою и жертвом насилства у фамелиї.
Дзепоєдни гражданє котри вошли до поступку замени кнїжочки поносую ше же на нову чекаю и по три мешаци, гоч би ю требали достац о 30 днї од придаваня вимоги. У РФЗО толкую же ше чека длужей прето же у другей половки рока звекшане число вимогох за виробок нових карточкох, а мешачно можу виробиц найвецей 350 000 карточки.