БЕОҐРАД – По евиденциї Националней служби за обезпечованє роботи (НСЗ) коло 200 000 млади нєзаняти, виявел вчера менаджер тиму Влади за социялне уключованє и зменшанє худобства Иван Секулович.
То 36 одсто и спрам нього Сербия у самим европским верху по нєзанятосци младих, визначел Секулович и наявел же Влада будзе вирабяц ясни плани же би нєзанятосц досцигла европски уровень од 15 одсто.
– За остатнї два роки маме позитивни тренди, алє вони нє отирмуюци, бо млади планую роботу у швеце – гварел Секулович за РТС. Як визначел, муши ше олєгчац преход младих зоз швета образованя до швета роботи, та ше пробує направиц партнерство медзи образовнима установами и приватнїками.
Тиж гварел же ше уж даскельо роки запровадзує активни мири у политики обезпечованя роботи, алє нє давю ефекти, и же буджетни укладаня нєдостаточни.
– У условийох кед макроекономска стабилносц витворена, маме простору за укладанє до нових моделох – студентских праксох, студентских роботох, партнерства з бизнис-заєднїцу. Тото ше одноши и на ресори просвити, привреди, финансийох – визначел Секулович.
Вон додал же Влада пробує направиц штири медзиресорни тими хтори ше буду занїмац з темами хтори вяжу вецей ресори – повязованє Сербиї з Европу и шветом, творенє економских обставинох за шицких, людски права и безпечносц и даванє лєпших услугох гражданом.