Нєшка можлїве розписованє виберанкох

автор зам
988 Опатрене

БЕОҐРАД – После вчерайшого гласаня о вецей законох, Народна скупштина Републики Сербиї мала остатнє зашеданє у терашнїм зволаню понеже предсидатель Влади Сербиї Александар Вучич предсидательови Сербиї Томиславови Николичови вчера послал Предлог з обгрунтованьом же би розпущел парламент и розписал виберанки за народних посланїкох.

Як вчера дознал Танюґ, обчекує ше же Томислав Николич нєшка на поладнє подпише Указ о розпущованю Скупштини и розпише виберанки, а по службеней процедури за тото ма 72 годзини.

Предсидатель Сербиї принєше и одлуку о датуме отримованя виберанкох, кеди и службено почню виберанково активносци, а по Уставу, виберанки маю буц закончени найпознєйше 60 днї од їх розписованя. Як наявел премиєр Вучич, найвироятнєйше же позарядово парламентарни виберанки буду 24. априла.

Понеже того року маю буц и порядни виберанки за Скупштину Войводини, як и на локалним уровню – за општински и городски скупштински зволаня, предсидателька Народней скупштини Мая Ґойкович вчера гварела же з предсидательом Скупштини АПВ Иштваном Пастором вироятно будзе догварене же би виберанки за шицки уровнї були исти дзень.

По розписованю виберанкох Народна скупштина будзе у технїчним мандату, а схадзки парламенту мож отримац лєм у одредзених позарядових ситуацийох.

ПОВЯЗАНИ ТЕКСТИ