БЕОҐРАД – Конститутивна схадзка нового зволаня Скупштини Сербиї мала би буц отримана до 4. юния, односно 30 днї од позавчерайшого сообщованя конєчних резултатох позарядових парламентарних виберанкох. Першу схадзку нового зволаня заказує дотерашня предсидателька Скупштини Мая Ґойкович.
По конєчних резултатох, коалиция коло Сербскей напредней странки у Скупштини Сербиї будзе мац 131 мандат, коалиция коло Социялистичней партиї Сербиї 29, Сербска радикална странка 22, Рух „Досц було”, та коалиция коло Демократскей странки по 16 мандати, а Двери-Демократска странка Сербиї, та коалиция Либерално демократскей партиї-Социялдемократскей странки и Лиґи социялдемократох Войводини по 13 мандати.
Союз войводянских Мадярох будзе мац 4 посланїкох, Бошняцка демократска заєднїца Муамера Зукорлича и Странка демократскей акциї Санджаку Сулеймана Уґлянина по двох, а по єден посланїцки мандат маю Желєна странка и Партия за демократске дїлованє.
Мандати новим посланїком Републична виберанкова комисия ма додзелїц до 15. мая, а додзелює ше их по рядошлїду кандидатох на виберанковей лїстини, починаюци од першого кандидата.
На першей схадзки нового зволаня Скупштини мандати буду потвердзени, а Скупштина конституована з потвердзованьом двох трецинох мандатох народних посланїкох, з чим престава мандат предходного зволаня.
На тей першей схадзки ма буц вибрани и нови предсидатель Скупштини, подпредсидателє и меновбани ґенерални секретар.