ТИРАНА (АЛБАНИЯ) – Членїца стаємней делеґациї Народней скупштини Сербиї у Парламентарней скупштини Процесу сотруднїцтва у юговосточней Европи (ПСЮЕ) Олена Папуґа 8. и 9. априла участвовала на схадзки Ґенералного одбору ПСЮЕ за социялни розвой, виглєдованє и науку, хтора отримани у Тирани, у Албаниї.
На схадзки бешедоване о защити правох дзецох у миґрацийних рушаньох, односно о малолїтних миґрантох у юговосточней Европи, як и о других актуалних збуваньох вязаних за миґрантох. Папуґова визначела же Сербия од початку миґрантскей кризи вибрала проактивни приступ и дала адекватну помоц у прилапйованю, дочасовим змесценю, здравственей защити, поживи, лїкох и другим цо потребне, як и шицки информациї о процедури за доставанє азилу, з полним почитованьом людских правох миґрантох, окреме дзецох.
Присутних на сходзе членїца делеґациї Сербиї Олена Папуґа поинформовала же Сербия принєсла Инструкциї о поступаню центрох за социялну роботу и установох з обласци социялней защити за змесцованє и охрану малолїтних миґрантох без провадзачох, потим Акцийни план за помоц, потримовку и защиту малолїтних миґрантох без провадзеня одроснутих, а пре благочасове, цалосне, єднаке и законїте поступанє спрам миґрантох у спомнутих установох. Визначела и шицки други активносци хтори Република Сербия, у сотруднїцтве з УНИЦЕФ-ом, дефиновала у поступаню з малолїтнима миґрантами.
На сходзе визначене же социялна когезия єден з главних заєднїцких цильох ПСЮЕ и у тим напряме нєпреривно будзе сотрудзовац з Медзинародну орґанизацию за миґрациї, УНИЦЕФ-ом, УНХЦР-ом, комесариятами за вибеженцох, нєвладовима орґанизациями и гуманитарнима орґанизациями у жемох Европскей униї.
