БЕОҐРАД – Пре защиту од крадзи и заменьованя дзецох, на єшень, перше у беоґрадских породзилїщох, почнє применьованє „Baby match” системи безпечносци. Вона подрозумює же ше на уходзе до породзилїща будуцим мацером будзе класц ґумову идентификацийну наруквицу, а кед ше народзи, беба достанє наножкицу хтора повязана з мацерову наруквицу.
– Од хвильки кед ше повяже мацерову наруквицу з дзецкову наножкицу почина контрола хто бере бебу и дзе ю ноши. Медицински шестри и бабици задлужени за беби буду нощиц окремни беджи и буду часц цалей системи. Кед дахто други вежнє бебу, софтвер то обачи. Теди ше автоматски активує аларм, завру уходни дзвери шпиталю и блокирую лифти. Исте ше збудзе и кед дахто пробує зняц, лєбо пререзац пантлїку – гварел Мирко Мандич з компаниї „Салмонт”, хтора заступа продукователя тих наруквицох з Израелу.
Пре векшу безпечносц, кед мац и беба буду виходзиц з породзилїща, будзе ше ище раз преверйовац.
– На мацерових наруквицох постої ґомбичка хтора ше при прицисканю автоматски парує з бебову. Кед на наруквици зашвици желєне шветло, значи же шицко у шоре, а кед ше зашвици червене, то значи же то нє єй беба – толкує Мандич.
Пилот-проєкт будзе запровадзени у двох беоґрадских породзилїщох, а компания „Салмонт” ше обовязала же найдзе способ його финансованя. На основи думаня занятих, положнїцох и фаховцох, после три до шейсц мешаци будзе одлучене чи система будзе запровадзена у шицких породзилїщох у Сербиї.