БЕОҐРАД – Родичи котрим потребни совити вязани за родительство, можу их безплатно достац и прейґ „Родительского телефону”, на число 0800-007-000, гварене концом прешлого тижня на представяню того телефону, а у присустве и министра за роботу, обезпечованє роботи, борецки и социялни питаня Александра Вулина.
„Родительки телефон” 3. мая того року заєднїцки основали Центер за защиту дзецох котри цицкаю, дзеци и младеж, а з потримовку спомнутого министерства, УНИЦЕФ-у и Телекому. Два роки будзе робиц як пилот-проєкт, после чого, кед ше укаже як хасновити, постанє стаємна услуга.
Як гварели з Центру, 25 психолоґи и педаґоґи за пол рока достали 526 поволанки родичох, котри найчастейше волаю прето же нє знаю „пречитац” одредзене справованє своїх дзецох, чи бунтовне справованє наймладших и одуперанє авторитету, лєбо нагле оцудзенє при адолесцентох.
З воланьом на спомнуте число, родичи, як и шицки други котри участвую у воспитованю дзецох, свойо дилеми можу ришиц прейґ розгварки з фаховцами, без обовязки даваня податкох, лєбо заказованя терминох за розгварку. И попри тим же тоти розгварки окончую фаховци, шицки маю ище и супервизорох.