НОВИ САД – Вчера урядово почала робиц часц „Каменїци 2” Институту у Сримскей Каменїци, дзе ше окончує знїманє и зарйованє найчежших пациєнтох хорих од карциному, виявел предсидатель Покраїнскей влади Иґор Мирович, а преноши Танюґ. Тота часц уж даскельо тижнї робела експериментално, и за тот час на терапиї зарйованя були коло 200 пациєнти, а вєдно з покраїнским премиєром „Каменїцу 2” вчера нащивел и покраїнски секретар за здравство Зоран Ґойкович.
З початком роботи акцелератору будзе значно зменшана лїстина чеканя, а за рок єй вироятно вецей анї нє будзе, гварене под час вчерайшей нащиви. Мирович наявел же други часци на 3. и 4. поверху почню робиц док ше набави опрему.
Мирович и Ґойкович вчера мали и схадзку з директорами Институту за кардиоваскуларни хороти, Институту за хороти плюцох и Институту за онколоґию на хторей бешедоване о початку часточней реконструкциї старих обєктох институтох у Сримскей Каменїци, як и здравствених установох у Войводини.
– Плануєме пооправяц шицки апарати у шицких реґионалних шпитальох и дотераз зме досц того поробели. У предходним периодзе зме мали ситуацию же дзепоєдни апарати були погубени и до рока. Нє допущиме же би ше таке дацо повторело, прето же зме нє нательо худобни же би нам шицки анґио-сали, маґнетни резонанци и ЦТ- апарати нє робели – поручел Мирович.