БЕОҐРАД – Републични буджет у 2016. року будзе 997,4 милиярди динари, одлучела всоботу, 12. децембра Скупштина Републики Сербиї. Плановане же розходи буду тисяч 119 милиярди динари, а з буджетом предвидзене и звекшанє плацох и пензийох за дзепоєдни обласци у явним секторе, преноша нашо медиї.
Гоч забрана анґажованя нових роботнїкох у явним секторе мала престац важиц од нового року, будзе предлужена и у 2016. року, дефиноване з новим Законом о буджетней системи. Прилапени и вименки финансийних планох Републичного фонду за пензийне и здравствене осиґуранє, Републичного фонду за здравствене осиґуранє, Националней служби за обезпечованє роботи и Фонду за социялне осиґуранє за 2015. рок, та їх финансийни плани за 2016. рок.
У новим року нас чекаю и векши акцизи на гориво и алкоголни напої, а министер финансийох Душан Вуйович гварел же дефицит будзе зменшани зоз звекшаньом акцизох и рационализацию у явним секторе.
Посланїки водзели оштру розправу о буджету за АП Войводину, хторей по Уставе Републики Сербиї шлїдзи седем одсто пенєжу з державного буджету. Министер Вуйович за РТС виявел же Войводина достанє 8,39 одсто, бо шицки трансфери хтори припадаю општином, приходи хтори АПВ достава за плаци, пенєж за гайзибански драги и мости идзе до покраїнского буджету.
З буджету Сербиї опредзелєни штири милиярди динари за софинансованє Радио-телевизиї Сербиї (РТС) и Радио-телевизиї Войводини (РТВ), а од 1. януара гражданє буду плациц и таксу за явни медийни сервиси. На управних одборох РТС и РТВ одлучене же би такса була 500 динари, алє пре способносц плаценя гражданох, будзе ше глєдац баланс у можлївосцох буджету и финансийних можлївосцох гражданох, поручене з Влади Сербиї.
Прилапени буджет достал потримовку ММФ.