БЕОҐРАД – На першим тогорочним зашеданю, хторе тирвало од 18. януара, Скупштина Сербиї вчера прилапела Закон о полициї, Закон о явному порядку и миру, та закон хтори реґулує оглашованє и информацийну безпечносц.
Нє прилапени предкладаня автентичних толмаченьох Закона о електронских медийох и Закона о авторских и зродних правох, хтори наишол на неґативни реакциї явносци.
Закон о полициї предвидзує реорґанизацию Министерства нукашнїх дїлох, кариєрне напредованє у тим секторе, творенє специялней єдинки и змоцньованє сектору нукашнєй контроли. Тиж так, по новим законє полицає годни хасновац електрошоки и розпирсковачи з надражуюцима средствами.
Опозиция оценєла же ше з новим законом оможлївює политизацию того сектору и гамує шлєбоду зазберованя, док предкладателє Закона наявюю лєпшу орґанизацию полициї и пооштрени условия за доставанє роботи у полициї, алє и за оставанє у служби. Утаргує ше Процивтерористичну єдинку, а остава Специялна антитерористична єдинка.
Нови Закон о явним порядку и миру дошлєбодзує сходи опрез шицких институцийох, окрем стратеґийних обєктох з обласци водоподмирйованя, енерґетики, войска, полициї, школох и оводох.
Тот закон предвидзує и санкционованє жобраня, та кари буду од 5 000 до 10 000, лєбо 30 днї гарешту. За толмаченє снох и предвидзованє судьби тиж одредзени кари од 10 000 до 50 000 динари, лєбо 40 до 120 годзини добродзечней роботи.
Закон о явним порядку и миру одредзує и одвичательносци комуналней полициї, понеже комунална полиция нє постояла у чаше кед прилапени прешли закон.