БЕОҐРАД – Од 2002. по 2011. рок валалске жительство у Сербиї ше зменшало за 10,9 одсто, а аж у 63 одсто обисцох нєт младших од 65 роки, пише Бета.
На основи податкох з виглєдованя „Положенє старших особох на валалє” предвидзує ше же по 2030. рок учасц старших од 65 роки будзе 21 одсто, а старших од 80 роки будзе пейц одсто.
Поверенїца за защиту ровноправносци Бранкица Янкович на представяню спомнутого виглєдованя гварела же пре таку демоґрафску структуру треба глєдац ришеня и предкладац их державним орґаном.
Директор Червеного крижу Сербиї Драґан Радванович оценєл же ситуация окреме чежка у валалох хтори оддалєнши од городох, прето же медицински и социялни услуги слабши.
Аж 59 одсто жительох на валалє польопривреднїки и ґаздинї, а 38 одсто роботнїки и службенїки. Як з нагоди представяня резултатох виглєдованя гварел социолоґ Ґрадимир Заїч, валал ше „феминизує”, понеже штредня старосц женох векша як хлопох.
Виглєдованє „Положенє старших особох на валалє” запровадзел Червени криж Сербиї, з потримовку Популацийного фонду Зєдинєних нацийох и Поверенїка за защиту за ровноправносц.