ВОЙВОДИНА – По податкох Националней служби за обезпечованє роботи, концом мая того року у Войводини було прейґ 170 500 нєзанятих, цо за коло 15 500 менєй як у маю прешлого року, пише новосадески „Дневник”.
Найвецей нєзанятих єст зоз, лєбо без законченей основней школи, коло 66 000, а кед слово о старосней структури, без роботи найвецей особи од 50 до 54 роки, скоро 21 000.
На роботу чекаю и коло 20 000 особи од 25 до 29 роки, а подобне число и нєзанятих особох од 30 до 34; 35 до 39; 40 до 44 и од 45 до 49 роки.
З цалосного числа нєзанятих у Войводини барз вельо єст нєдостаточно образованих, односно котри нє маю нїяки фах.