КОЦУР – Євангелска церква зоз Коцура, у сотруднїцтве з християнским Здруженьом „Здрава заєднїца”, всоботу, 17. септембра орґанизовала семинар з тему „Як одшмелїц Ромох най сами ришую свойо проблеми”. Семинар отримани на Косанчичу, а на нїм участвовали заинтересовани члени церкви, як и особи котри ше занїмаю з гуманитарну и социялну роботу з валалу, околїска и иножемства.
Семинар мал вецей обдумани интерактивни бешедни роботнї на хторих учашнїки подзелєли свойо искуства з другима, а найвецей бешедоване ше о тим же як обєдинїц духовну помоц з физичним, односно материялним помаганьом людзом у потреби.
Як место за роботнї послужел простор коло салашу хтори Євангелска церква нєдавно одкупела дзекуюци донациї волонтерох з Голандиї, та семинар перши реализовани проєкт на тим месце, хторе у будучносци будзе претворене до ромского конференцийного центру. Тот простор, окрем Євангелскей церкви, буду хасновац и орґанизациї за помоц ментално нєдостаточно розвитим особом, як и Червени криж, а першенствено є наменєни дзецом як место за вилєти и одпочивок.