ВЕРБАС – У просторийох КПД „Карпати” у Вербаше пияток вечар 14. фебруара, отримане друженє под назву „Рок вечар Карпати”.
Любительох рок музики котри виполнєли просториї Дружтва привитал предсидатель вербаского КПД „Карпати” Микола Папуґа, а потим ше на бини зменьовали рокенрол музичаре.
Перша наступела ґрупа „Карпати рок”, у чиїм составе музичаре котри ше зишли, як гварене, пред двома мешацами, алє ше познаю и дружа вецей як пол вика. На буґнох грал Стоян Ратков – Цоле, на ґитарох Андрия Червеняк – Диша и Мият Ускокович – Мито и бас Микола Папуґа, котри их и позберал.
Потим на бину вишoл госцуюци рок состав зоз Нового Орахова и публику розвешелєли зоз старима и добрима рок гитами. На клавиятури грал Золтан Дудаш, ґитару Жолт Бульовчич, бас ґитару Золтан Чабаї, а на буґнох Славко Колошняї. Як визначели новоораховски музичаре, поволанку наступиц дзечнє прилапели, а наздаваю ше же ше таки стретнуца предлужа и надалєй отримовац.
З тей нагоди ше представели и младши вербаски музичаре – бенд „ДНД” котри творя школяре стреднєй школи. Вони ше представели зоз пригоднима старшима и новшима шпиванками, а у составе того бенду Нина Комненич котра грає бас ґитару, Дуня Макич ґитару, Дуня Вукович шпивачка, Оливера Дабетич на кларинету и Милан Арсениєвич на буґнох.
Остатнї наступел вербаски бенд „Дионис” котри творя шпивач Милан Арсениєвич, Матия Сивч на буґнох, Милян Савичевич на соло ґитари, Никола Бабович на бас ґитари и Ана Вушурович на клавиятурох.
Публика уживала и кажду писню и наступ наградзела зоз гласним аплаузом. Як ше зложели шицки на концу, наздаваю ше же таки друженя и таки вечари пошвецени рок музики прейду до традициї.