ВЕРБАС – У присустве числених парохиянох и госцох у Грекокатолїцкей церкви святого Владимира у Новим Вербаше внєдзелю, 27. юлия, святочно преславене храмове швето Кирбай.
Архиєрейску Службу Божу служел преосвящени владика кир Георгий Джуджар, а сослужели числени священїки зоз наших парохийох, як и зоз иножемства. Евангелию читал Иван Дацешен.
Владика кир Георгий Джуджар у казанї гварел же славиме Велького княза Владимира и висловюєме му подзекованє же приял Боже поволанє, же приял християнство и же Бог прейґ нього благословел його цали народ и будуци поколєня, та и нас.
Парохиян зоз Нового Вербасу, диякон Иван Дацешен, на служби пошвецени за паноца, неоєрея и вон на концу служби поблагословел шицких присутних, священїкох, госцох и парохиянох.
Привитуюци шицких на Служби Божей домашнї, парох у Новим Вербаше, отец Данил Задрепко привитал владику кир Георгия Джуджара, священїкох, часни шестри, панїматки, як и представнїка Министерства правди, управи за сотруднїцтво з церквами и вирскима заєднїцами Ґаврила Ґрбана.
На служби шпивали дзиячки з Коцура: Ирина Мади и Татяна Мученски.
По законченю кирбайскей Служби Божей у парохийней сали бул и аґапе за госцох котри пришли з домашнїма возвелїчац швето Владимира Велького.
