РУСКИ КЕРЕСТУР – Зоз початком Вельконоцного посту пондзелок, 16. фебруара, вирним хтори швета славя по грегориянским календаре, почал час кед забранєни свадзби и явни вешеля. Того дня ше строго посцело.
Цали час посту стреду и пияток ше служа Преждеосвящени Служби на 17 годзин у Церкви св.о. Миколая.
На нєдзелю, 22. фебруара, у Старим манастире на Капущаним шоре Хресна драга на 16 годзин.
Под час Вельконоцного посту у Новим манастире (Фрушкогорска улїца), вовторками после вечаршей Служби Божей, ше модлї молитва хтора ше модлї под час Вельконоцного посту Свята годзина.
Закончена акция за Планчакових хторим погорела хижа. Дзвончок у церкви: 41.700 динари и 35 евра, а на парохиї назберане ище 32 тисячи динари.
Ранши Служби и далєй у Новим манастире, а вечарши у церкви.
Уписує ше и далєй Грамоти, бо ше будзе ище служиц штири грамотални служби. Потераз на Грамоти дала 171 фамелия.
У Центру Йосафата, всоботу, 14. фебрара дзеци зоз ш. Авґустину Илюк и Таню Бики пражели череґи. Була то нагода за друженє през хторе дзеци научели вариц тото нашо старе традицийне єдло.
