РУСКИ КЕРЕСТУР – У основней и штреднєй школи зоз домом школярох Петро Кузмяк за школяра ґенерациї штреднєй школи, у тим школским року, вибрана Емина Бики.
З тей нагоди, у цалосци преношиме винчованку и текст о Еминових успихох хтори керестурска школа обявела на своїм урядовим Фейсбук боку.
„Емина Бики шицки штири роки ґимназийного образованя витворела одлични успих зоз просекову оцену 5,00 и прикладним справованьом. Од першого дня школованя указовала окремну одвичательносц, роботни звикнуца, упартосц и пошвеценост образованю, а зоз своїм справованьом и одношеньом ґу школским обовязком представяла приклад другим школяром.
Попри окремного успиху у настави, Емина витворела резултати на змаганьох зоз биолоґиї у першим и другим року, друге место на Смотри кирилскей писменосци 2025. року и перше место на Смотри кирилскей писменосци 2026. року. Окремне припознанє представя диплома Покраїнскей влади АП Войводини за посцигнути окремни резултати у обласци руского язика.
У штредньошколским образованю була барз активна у числених домашнїх и медзинародних проєктох. Участвовала у програми интеркултуралней черанки „Песталоциˮ у Швайцарскей, як и у вецей Еразмус+ проєктох у Италиї. Була учашнїк медзинародног образовного проєкту „CybHERˮ у орґанизациї British Council-а, як и проєктох „Digital Safety Initiativeˮ, „Upshiftˮ, „Медийна писменосц за европску будучностˮ, „Мейкерслаб – мудра заградкаˮ и „Цо нам чежкоˮ. Зоз своїм анґажованьом у тих активносцох допринєсла промоциї школи у жеми и иножемстве, здобуваюци нови знаня и схопносци хтори нєсебично дзелєла зоз своїма парняками.
Емина у своїм штредньошколским школованю була активни член Школярского парламенту и участвовала у роботи оддзелєньскей заєднїци. Зоз своїма предкладанями и активносцами доприношела унапредзованю школярского живота и розвою позитивней школскей атмосфери.
Окремну вредносц Емини Бики видно у єй людских характеристикох. У школованю указовала високи ступень емпатиї, товаришства и порихтаносци помогнуц другим. Уживала довириє своїх парнякох, вше ше зоз почитованьом одношела ґу наставнїком, фаховим сотруднїком у ґу шицким занятим у школи.
Зоз своїм знаньом, роботу, дружтвеним анґажованьом и людскима вредносцами у подполносци заслужела найвисше припознанє хторе школа додзелює школяром – титулу школяра ґенерациїˮ.