РУСКИ КЕРЕСТУР – На вчерайшим першим вечару 65. Фестивалу рускей култури „Червена ружа”, награду за найкрасши гласи, односно кошарку зоз червенима ружами и стилизовану дзивоцку ладу, достала Лана Вулич зоз Миклошевцох у Републики Горватскей, хтора наступела зоз шпиванку „Ей сущела лїщина”, а чобольов додзелєни Иванови Фейдийовому зоз Руского Керестура, хтори одшпивал шпиванку „Тополї керестурски”.
На бини у дворе Школи „Петро Кузмяк” пияток, 26. юния, за титулу найкрасши глас, попри двоїх побиднїкох, змагали ше ище осмеро млади шпиваче – Михайло Грищук, Милена Корпаш, Ема Живкович, Ника Вулич, Михаела Миклош, Марко Колошняї, Даница Плавшич и Николина Бучко.
Наступ шпивачох оценьовал жири у составе Мирослава Даждиу, Михал Барна и Мирослав Малацко хтори, у мено жирию, окреме похвалєл и наступи Даници Плавшич и Марка Колошняя.
Наступ шпивачох провадзел Народни оркестер Дома култури Руски Керестур „Юлиян Рамач Чамо”, под руководством Кристияна Нярадия, хтори и приспособел аранжмани за шицки шпиванки. Няради, вєдно зоз Андрею Бики бул и руководитель програми змаганя за найкрасши глас, конферансу написала Адрияна Фейди а цаловечаршу програму водзели Адриана Надь Барна и Андрей Орос.
После змаганя за найкрасши дзивоцки и леґиньски глас, у предлуженю програми отримане и Змаганє нових композицийох у забавним духу, а потим и ревиялна часц пошвецена Юлиянови Рамачови Чамови, понеже би ше того року наполнєли 40 роки як би бул заняти у култури.
