ВЕРБАС – Збор гражданох Вербасу од остатнїх дньох прешлого мешаца континуовано орґанизує блокади по городзе. Вельке число гражданох нєпреривно участвує на орґанизованох сходох, котри углавним починаю од 20 годзин вечар и тирваю до пол ноци.
Предходних дньох бул блокирани уход до Вербасу з напряму Кули при Медели, крижна драга на месце дзе ше стредами отримує пияц, як и крижна драга при Лидлу, дзе ше найчастейше и орґанизує зберанє гуманитарней помоци за людзох з котрих залапело нєщесце з огнями на югу Сербиї.
Окрем того, Збор гражданох Вербасу орґанизовал и вецей блокади у самим центру городу, кед була блокирана улїчка Маршала Тита од крижней драги при Пошти по крижну драгу зоз улїчку Иве Лоли Рибара. У тей вецейгодзиновей блокади людзе ше шпацирали по тей часци городу, вожели бициґли, ходзели зоз державнима заставами и пискали до пищкох, а полиция обезпечовала блокади на обидвох концох.
Потераз на отриманих блокадох нє було векши инциденти.
Стреду, 16. юлия, при Медели од 20 годзин тиж була отримана вецейгодзинова блокада драги на виходу з Вербасу спрам Кули, а Збор гражданох Вербасу орґанизовал и подписованє петициї за розписованє виберанкох.
