НОВИ САД – Министерство науки, технолоґийного розвою и иновацийох Влади Републики Сербиї обявело Лїстину катеґоризованих наукових часописох за 2023. рок, чийо видавателє зоз Републики Сербиї, на котрей и у тим року Часопис за науку, литературу, културу и уметносц „Шветлосц”.
Часопис од того року вєдно видаваю НВУ „Руске слово” и Филозофски факултет з Нового Саду – Оддзелєнє за русинистику.
Часопис за науку, литературу, културу и уметносц „Шветлосц” од того року катеґоризовани як М53 – домашнї наукови часопис за обласц сербски язик и литература, цо значи же напредовал на лїстини и висше є катеґоризовани як пред тим (скорей бул у катеґоризациї М54).
У науково катеґоризованей „Шветлосци” свойо фахово роботи за остатнї штири роки обявели: др Йоаким Стрибер, др Юлиян Тамаш, др Янко Рамач, др Юлиян Рамач, др Олег Петрук, др Олег Румянцев, др Йосиф Вархол, др Даниела Тамаш, др Петер Женюх, др Богдан Гальчак, др Маряна Комариця, др Кристиян Екер, др Оксана Тимко Дїтко, др Ана Римар Симунович, др Александер Мудри, мр Славомир Олеяр, мср Мирослав Кевежди, мср Саша Сабадош, мср Єлена Дудаш, мср Марина Сакач, Надїя Вархол, Ваня Дула, Смиля Вукотич, Лїляна Симич, Кристина Раяк и Микола М. Цап.
Попри часописа „Шветлосц”, на тей лїстини з исту катеґоризацию М53 и „Русинистични студиї / Ruthenian Studies”, котри обявює Оддзелєнє за русинистику Филозофского факултету у Новим Садзе. Зоз тим руски науковци достали можлївосц наукового розвою и напредованя, а статї з тей лїстини реферовани и у Web of Science (SCI-E, SSCI, AHCI) и у Journal Citation Report (JCR).
Часопис „Шветлосц” бул подполно змистово и визуално реформовани 2019. року, а теди му ґу назви додате же є виданє и за науку. Од 2023. року вєдно го видаваю НВУ „Руске слово” и Филозофски факултет з Нового Саду – Оддзелєнє за русинистику.