Фамелийни святочносци, винчаня, роботни забави и подїї, як и рижни манифестациї вше провадзени зоз смачну закуску котра саме случованє збогаци.
Остатнї час вше присутнєйши и популарнєйши кетеринґ, котри зоз креативносцу, совершено вискладанима танєрами з рижнима смачнима лакотками з каждей подїї направи нєзабутну подїю. У роботи правеня тих красних и смачних фалаткох ше помали, алє сиґурно, доказує и наша собешеднїца Сладяна Няради з Коцура.
Oдмалючка любела вариц и ище як дзивче часто бависко и бабки заменьовала зоз варешку, муку, мегким цестом… Кед ше рихтало за госцох дома, у кухнї вше помагала, а часто була и главна кухарка.
– Од кеди паметам, шицко цо мало вязи з кухню ме барз цикавело и ище теди сом гуторела же єдного дня будзем кухарка – нашмеяно почина приповедку Сладяна – и то ми ше и витворело. Уписала сом ше до стреднєй школи на напрям за кулинарского технїчара и такой после законченя школи почала сом робиц у єдним ресторану у Бачким Петровцу. Перше сом правела пици, роштиль и подобне, а кажди нови роботни дзень бул нове виволанє, алє и нове задовольство.
ЛЮБОВ ҐУ КУЛИНАРСТВУ ОДМАЛЮЧКА
Як час преходзел, у нашей младей собешеднїци вше баржей росла любов ґу кулинарству. У тим ресторану робела даскельо роки, потим прешла робиц до другого, та и до трецого ресторану и так зберала искуства, нови схопносци и була вше успишнєйша у своїм фаху.
– Вше сом любела складац закуску, дзе шицко так крашнє випатра и дзе заступени вельо фарби… Вше ме то прицаговало и вше сом ше ґурала буц тота хтора то будзе робиц – предлужує з ошмихом – тота цифрованосц на столох ми барз була цикава. Пред даскельома роками ше зявела идея же бим любела робиц даяки кетеринґ и дацо тому подобне и кед сом престала робиц у ресторану дзе сом була занята, гварела сом себе же тераз права хвилька за таке – тераз кед нє почнєм з кетеринґом, нє почнєм нїґда.
Же би ше опробовала у шицким тим цо задумала, Сладяна порихтала и видекоровала шицку закуску за преславу родзеного дня шестрового дзивчатка. То була красна нагода же би ше з идею за роботу представела перше своїм найблїзшим.
– Теди сом ше прешвечела же мнє то идзе, госци були задовольни, и гоч сом першираз на таки способ рихтала цалу закуску, заключела сом же я то можем робиц и же ми то нє напарте. Пачело ми ше и же шицку роботу можем зробиц дома. Пред даскельома мешацами сом почала робиц досц озбильнєйше и видзим же людзе задовольни, шорую ше красни коментари и позитивни упечатки. Щиро, любела бим кед би ми ше удало шицко цо сом задумала, тиж и же бим преширела асортиман понукнуца, а можебуц уведла аж и дацо вецей, наприклад як цо виробок шведских столох. Ґу тому помали крачам и то мой даяки циль – бешедує Сладяна.
КОМБИНУЄ ИДЕЇ ЗОЗ СВОЮ МРИЮ И ВИЗИЮ
Сладяново понукнуце ше тераз базує на сланих лакоткох, алє планує уключиц и десерти у погарикох – чизкейк, тирамису, овоц у погарикох и тому подобне. То тиж научела правиц, а як гвари, то вше крашнє випатра на шведских столох, а и шицки то любя. Шицко цо облапя закуска котру понука, Сладяна прави сама, дакеди лєм кед ма даяки векши наручбини, теди єй шестра помогнє.
– Идеї за шицко найчастейше находзим на интернету, опатрам як други робя, даяки идеї краднєм од своїх колеґох и з Пинтересту. До шицкого того уключим и свою мрию и свою визию же би було так як я задумала и на концу шицко випаднє наисце крашнє. Промовуєм ше на дружтвених мрежох, на Фейсбук налогу – Ketering Sladjana Njaradi и на Инстаґраму – sladjinizalogaji. Направела сом и визиткарточки, а мам и свой лоґо котри мож видзиц на шкатулох зоз наручбинами. Помали, та ше пречує, розшири, затераз сом лєм початнїк у шицким тим, а накадзи ше цала робота крашнє розшири и будзе так як я задумала, плануєм реґистровац роботню и дзвигнуц шицко на озбильнєйши уровень. Алє помали, нє понаглям – толкує нам Сладяна.
ТАКИ СПОСОБ СЕРВИРАНЯ ЛАКОТКОХ ЛЮДЗОМ ЦИКАВИ.
По Сладянових словох, людзом таки способ сервираня лакоткох и закуски ту у околїску постал тераз цикави, прето же на тих древених дескох вше єст досц фарби, а вона ше намага декоровац и з даякима овоцами же би шицко було цо цифрованше.
– Старши ше углавним опредзелюю за класични понукнуца – кроасани, мини-пици и подобне, а млади любя пробовац и даяки нови смаки и жадаю же би то випатрало цо красше, та наручую и рижни слани торти, ролати, мали сендвичи… Млади сцу же би було цо вецей фалаточки и цо вецей фарби на тацнох. Млади углавним сцу же би шицко я сервирала и видекоровала на древених дескох, такволаних платох, цо на даяки способ була и моя задумка од початку. Старши частейше за класичне випоручованє, же бим им лєм однєсла, а вони вец то сами уж дома поскладаю на свойо танєри – толкує наша собешеднїца.
Сладянова закуска котру понука облапя кроасани, мини-пици, мини-сендвичи, слани торти зоз тост хлєбом и зоз похованима паприґами, слани ролати зоз шпинатом, айваром, поґачики зоз сиром… Шицки фалаточки зоз єй кухнї можу буц приготовени на посни и масни способ. Планує ище даяки фалаточки уключиц до понукнуца, а перши на шоре домашнї рейтеши з цеста котре би сама ручно розцаговала, цо ю научела єй баба. Тоти рейтеши ю вше здогадню на дзецинство и на найсмачнєйши бабово рейтеши.
– Кед сом першираз обявела на Фейсбуку же починам робиц кетеринґ, нє прешло 10 минути и контактовала ме єдна дзивка з Коцура и наручела закуску. Исти дзень, можем повесц, шицко успишно почало. Дзивка була презадовольна, та ме почала хвалїц и рекламовац далєй, а мнє шерцо було полне и наисце ми було мило. Найвекша и нєзаобиходна потримовка у шицким ми супруг Никола и нашо дзивчатка Хана и Даря, вони моя моц же бим шмело крачала и була лєм успишнєйша у тим цо робим – гварела на концу Сладяна.
