Того року полнї ше 80 роки од законченя Другей шветовей войни, найвекшого воєного зраженя у дотерашнєй историї чловечества, после хторого зачати и креировани сучасни ґлобални порядок на планети у яким, голєм затераз, ище вше жиєме.
Дзешка на предходней общей констатациї закончує ше консензус коло тей епохалней подїї, а спореня починаю уж на прозаичним – кеди и дзе точно ше то случело. Дзешка по конєц ХХ вику, з тим питаньом ше скоро виключно занїмала наука и академска заєднїца. Зависно од школох думаня, историчаре дискутовали и дебатовали на основи фактох, документох и шведоченьох актерох хтори у тот час ище жили и були при розуме. Соглашене, а так ше учело и у школох, же война на европским боїску закончена 8./9. мая 1945, а на Пацифику, дефакто, штредком авґуста (после Гирошими и Наґасакия), а формално и дефинитивно 2. септембра 1945. року. З тим, шейсц роки и єден дзень после нєобявеного початку, закончена Друга шветова война.
Точни европски датум роками бул упитни пре формалне толкованє самого акту нємецкей капитулациї, як и пре – часово зони. Отже, нємецка команда ше заходним союзнїком придала у французким Ремсу 7. мая, а шлїдуюцого вечара урядова церемония подписованя безусловней капитулациї повторена у Берлину, у присустве совєтского висланства и камерох. Акт на моц ступел на 23.01 годзин по европским чаше, док то у московскей часовей зони уж була минута после полноци 9. мая…
На 50. рочнїцу законченя Другей шветовей войни 9. мая 1995. року, шветово лидере и шицки дакедишнї союзнїки перши и остатнї раз ше зишли на воєней паради у Москви. Основне порученє и упечаток були почесц и пиєтет ґу милионским совєтским жертвом убудованим до побиди.
У дакедишнїм Совєтским союзу и векшей часци Восточного блоку 9. май ше славел як Дзень побиди, а тот датум нови живот, значенє и идеолоґийну надбудов достал у нєшкайшей Русиї, як и у державох хтори ґравитую ґу Москви.
На шлїду анґлосаксонскей воєней традициї, на Заходзе ше 8. мая слави такволани V-E Day (Дзень побиди у Европи), док остатнєй децениї главна комеморативна подїя у Европскей униї рочнїца Дня Де, инвазиї 6. юния 1944, хтора ше на нормандийских плажох означує з трансатлантскима союзнїками. На заходзе континенту, 9. май насампредз Дзень Европи, спомин на Шуманову декларацию кед зачата идея о Заєднїци. У Руским Керестуре 9. мая, на лєтного Миколая, Кирбай.
Винчуєме вам 9. май, гоч по хторим календару го швецице…