Швидки дружтвени пременки, хтори пошлїдок розвою нових технолоґийох у 21. вику, без преседана у историї чловечества, приведли до розвою штучней интелиґенциї, хтора постала ґлобални феномен. Штучна интелиґенция помали уходзи до каждодньового живота и ма потенциял же би за дас дзешец роки могла пременїц способ функционованя цалого нєшкайшого дружтва – од транспорту, прейґ комуникацийох, та по животни звикнуца.
Же штучна интелиґенция уж вошла до наших животох як приклад ше наводзи патренє телевизиї прейґ операторох, хтори вам такой понукаю тото цо би було за вас интересантне, а хаснує ше и у провадзеню ваших активносцох на дружтвених мрежох. Аж и кед пойдзеце до банки пре кредит, исную даяки модели хтори тото робя место банки, понеже вецей нєможлїве же би тото шицко чловек робел сам, исную велї алґоритми хтори ше применюю.
Фаховци думаю же чловечество ма огранїчени ресурси и же штучна интелиґенция може допринєсц напредованю дружтва, роботи и роботного штредку, алє синдикати думаю же єй звекшане хаснованє приведзе до зменшаня хаснованя людскей роботи. Тиж так будзе требац прилагодзовац и образовну систему, бо нєшкайших школярох причекаю занїманя яки нєшка нє исную.
Штучна интелиґенция би могла буц єден з найвекших ризикох за будучносц чловечества. Вона як технолоґия анї нє позитивна, анї нє неґативна, алє єй вельки можлївосци и схопносци превозиходза людски и можу нас загрожиц, та ше поставяю етични питаня же дзе треба поставиц гранїцу з єй розвойом.
У Нарису о етичних напрямкох розвою, применки и хаснованю одвичательней штучней интелиґенциї уж ше роздумує о законским рамику, а хтори дефиновал коло дзешец розлични системи хтори хасную штучну интелиґенцию и могли би мац манипулативни и неґативни уплїв на поєдинца або дружтво у цалосци.
Ґу високо ризичним системом спадаю гевти котри ше одноша на биометрийну идентификацию и катеґоризацию поєдинца, управянє з инфраструктуру (транспорт, вода, ґаз), алґоритми хтори ше хасную у образованю при вибору и оценьованю кандидатох, алґоритми хтори селектую кандидатох при доставаню роботи, системи хтори анализую ґенетични и здравствени податки, системи за даванє социялних услугох…
Сет законох о штучней интелиґенциї лєм треба же би бул усвоєни у Европскей униї, дзе уж прилапени Етични напрямки за єй розвой, а тот документ основа и за нашо законски напрямки. Напрямки дефиную основни начала и представяю основу за Закон о штучней интелиґенциї, а кеди мож обчековац Закон, затераз ище нє познате.
Тоти цо хасную технолоґию, то ми, людзе, и лєм од нас завиши чи идземе ґу дистопиї чи утопиї, як вихаснуєме технолоґию хтора нам на розполаганю и хтора нам може буц од велькей помоци, лєм же би ше нє случело же нас заменї у процесу приношеня одлукох. Од нас, людзох, завиши.
ruske.redaktorka@gmail.com