ВЕРБАС – У Грекокатолїцкей церкви Покрова Пресвятей Богородици у Старим Вербаше внєдзелю, 22. децембра, преславене швето святого Миколая.
У Служби Божей парох старовербаски о. Алексий Гудак присутних вирних здогаднул на дїла святого оца Миколая. Тот святочни дзень бул прикрашени зоз молитву и шпиванку парохиянох.
З нагоди того швета отримана и пригодна програма котру пририхтали учителька Славица Мали зоз школярами основних школох зоз Вербасу котри уключени до настави руского язика зоз елементами националней култури и вироучителька Ксения Бесерминї зоз виронаучнима дзецми грекокатолїцкей вири. Числени шпиванки и рецитациї, драмски слички на чесц святому Миколайови ше зменьовали, а у музичних точкох програми дзеци на гармоники провадзел Любомир Скубан.
И того року Миколай нащивел дзеци у старовербаскей парохиї, а по законченю програми и краткей розгварки з нїма, обрадовал наймладших и подзелєл им пакецики.