РУСКИ КЕРЕСТУР – Информация же потерашня, длугорочна дохторка общей пракси др Златана Надь, здобула условиє за одход до пензиї медзи жителями Руского Керестура нєдавно виволала забриґованосц чи валал будзе мац стаємного лїкара.
На єден завод була порушана и петиция же би ше дохторку врацело на єй роботне место, та ситуацию за „Рутенпрес” и „Руске словоˮ, розяшнєла директорка Дому здравя Кула, др Весна Томич.
Понеже дохторка Златана Надь сполнєла шицки законски условия за одход до пензиї, як гварела директорка Дома здравя Кула др Весна Томич, вона нє у можлївосци предлужовац єй роботу, алє на место Надьовей придзе нови, младши дохтор хтори би требал почац робиц штредком фебруара.
– Нє окончуєм нїяку старосну дискриминацию, анї дискриминацию жительох Руского Керестура у одношеню на други места, гварела, алє думам же час же би ше указало нагоду и младшим дохтором. З оглядом же колеґа дохтор Ярослав Колбас зоз Наглей помоци при самим концу специялизациї общей пракси, а зна и бешедовац по руски, вон достанє Керестур, так же Керестур нє останє без лїкара як дзепоєдни думали. Дохтор Колбас ма озбильнє искуство, водзи и совитовалїще за диябетес, цо значи же маме у плану розвивац и нови совитовалїща, та думам же Керестуру тота пременка може буц лєм на хасен – наглашела Томичова и додала же ше роби и на тим же би Керестурци на цалодньовим уровню, односно од 7 годзин рано по 19 годзин мали двох занятих лїкарох.
Директорка Дому здравя надовязала ше и на проблематику дефициту педиятра у Руским Керестуре, та спомла же проблем иснує на уровню цалей општини, алє понеже хвильково єст пецерих дохторох на специялизациї зоз педиятриї, дохторе буду адекватно розпоредзени у моменту накадзи законча специялизацию.
Кед слово о реновираню Здравственей амбуланти у Кереустуре, планує ше покласц нову ПВЦ столарию, набавиц нови мебель, а у плану и же би шицки установи у рамикох Дому здравя прешли на ґас, наявела директорка Дому здравя Кула.