ВЕРБАС – Kонтактна мрежа на нововибудованей часци швидкей пруги Нови Сад–Вербас од того тижня под високим напруженьом, сообщене зоз „Инфраструктури желєзнїци Сербиї” и вони спозорюю же кажде нєпрописне и неовласцене рушанє у зони будовалїща и контактней мрежи опасне по живот и забранєне.
През контактну мрежу преходзи струя високого напруженя од 25.000 волти и у тей ситуациї струйне коло може буц и по даскельо метери од струйних водох. У таких случайох нє нєобходне же би ше дорушело дроти, досц лєм войсц до струйного кола и дожиц струйне вдеренє, хторе ше найчастейше траґично закончує.
Прето нє треба исц блїзко ґу будовалїщу, же би животи нє були загрожени, апелую зоз подприємства „Инфраструктури желєзнїци Сербиї”.
На траси швидкей пруги од Нового Саду по Суботицу буду поставени 4.568 слупи контактней мрежи зоз шицкима потребнима инсталациями, и тота робота скоро у подполносци закончена. Вонконцом швидкей пруги будзе розцагнути 361 километер контактней мрежи.
