РУСКИ КЕРЕСТУР – Волонтерски камп под назву „Лєто у Керестуре” почал штварток, 1. авґуста, та учашнїки перши два днї рисовали мурали на пияцу, а нєшка буду рисовац мурал на Огньогасним доме.
За перши два днї кампу, штварток и пияток, даскельо малюнки на муре, на керестурским пияцу, волонтере префарбели на било, а потим намальовали два мурали зоз мотивами фестивалу „Червеней ружиˮ и надпис Здруженя гражданох „Pact Ruthenorumˮ. На пияцу вчера префарбени и трибини за кошаркашски терен, а од пондзелку предлужи ше зоз мальованьом муралох на тей локациї.
Коло дзешецеро учашнїки кампу, кельо ше приявели того року, а шицки з Керестура, нєшка буду рисовац мурали на Огньогасним доме, док ше за ютре, нєдзелю, од 17 годзин планує роботну акцию пораєня и збераня шмеца у Старей школи.
