ВЕРБАС/КОЦУР – Термин за подписованє спорозуменьох о резервациї и хаснованю пиячного простору на пияцох з котрима управя ЯКП „Комуналєц” з Вербасу, почал всоботу, 16. марца. Предавачом контракти важа по 31. марец, а по теди нєобходне подписац нови контракти. Цена закупу пиячного простору остала нєпременєна.
По сообщеню инкасанта Блаґоя Делибашича, продукователє и предаваче зоз шицких крайох котри жадаю предлужиц предавац на пияцох у Вербаше, Змаєве лєбо Коцуре треба же би обновели закуп пиячного простору, односно же би резервовали свойо место. Тото исте важи и за нових закупцох.
Контракти ше заключує на период од 1. априла 2024. року по 31. марец 2025. року. Заинтересовани закупци треба же би пришли до просторийох пиячней управи того дня кед ше отримує пияц у Вербаше и Змаєве, а у Коцуре ше контракти будзе заключовац у просторийох Добродзечного огньогасного дружтва.
Контракти ше подписує на єден рок, а виплациц мож на вецей мешачни рати, у зависносци од виносу.
Перши контракти подписани уж всоботу, 16. марца, на Вельким пияцу у Вербаше, шлїдуюци на шоре пияц у Змаєве 19. марца. На Малим пияцу у Вербаше закупиц пиячни простор годно на стреду, 20. марца, а на пияток, 22. марца на пияцу у Коцуре. На Вельким пияцу у Вербаше контракти годно подписац ище 23. и 30. марца, а на Малим пияцу стреду, 27. марца.
Контракти ше будзе подписовац наведзених дньох, у периоду од 6 по 14 годзин. Вецей информациї заинтересовани можу достац на число телефона 021/706-575, лєбо ше информовац на дружтвених мрежох ЯКП „Комуналєц”.
