Потримовка новей ґенерациї

автор И. Сабадош
78 Опатрене

У пригодних бешедох з нагоди Националного швета Руснацох чолнїки Националного совиту Руснацох на вецей заводи, и на централней преслави у Сримскей Митровици, и на локалних преславох у местох дзе наша заєднїца жиє, повторйовали и визначовали два факти хтори свойофайтови лайтмотив тогорочного Дня Руснацох – же Националне швето  хторе славиме од 2008. року, доросло по полнолїтство понеже є тераз означене 18-раз, и же окреме далєкосяжна одлука була конциповац го так, же би ше його централна преслава кажди рок отримовала у другим месце – валалє лєбо городу, дзе єст орґанизовани културни и явни живот рускей заєднїци.

Осемнацрочни континуитет указує же Националне швето Руснацох нє остало лєм на словох и задумки як дочасови каприц, алє же ше наисце прияло у нашей заєднїци и постало централни датум у руским календаре. Можебуц то так праве и пре його циклични, селїдбени характер – шицки тутейши Руснаци, без огляду дзе жию, можу го тримац за свойо. После 18 рокох уж зме глїбоко вошли до другого циклусу преслави. Нашо места хтори гинто були медзи першима домашнїма Националного швета, єдно за другим з рока на рок ознова пребераю тоту чесц. Там дзе памятка як то першираз було помали бляднє, а з ню ше можебуц гаши и руски ентузиязем, пошвидко ше ознова придзе на шор, праве начас же би ше обновела дзека и енерґия заєднїци.

Руснаци у Сримскей Митровици, хтори того року други раз були домашнї Централней преслави нашого Националного швета, можебуц и найлєпши приклад же то наисце так. Окреме понеже ситуация з руснацтвом у тим городзе досц специфична, єдинствена у поровнаню з нашима другима штредками. Як то барз крашнє, обєктивно и без скарги потолковал Владимир Балащак, без сумнїву наисце порушуюца сила хтора отримує културни живот рускей заєднїци у тим сримским городзе, Руснаци ше ту практично од початку присельованя, уж у першей-другей ґенерациї оцудзели од мацеринского язика. Живот у городзе хтори оддалєни од главних руских штредкох, алє є источашнє и вельки, моцни и живи реґионални центер без прерви од античних часох по нєшка, диктовал же би то було так. Прето мисия и поволанє Дружтва Руснацох Сримскей Митровици хторе формално почало робиц пред 20 роками, насампредз отримац памятку и чувство свойого членства же хто су и цо су и з якого су кореня.

Тераз то през културни и вирски живот, алє єст намира и дзека, а наздавац ше же будзе и моци, обновиц и факултативну наставу руского язика у Сримскей Митровици, хтора свойочасово функционовала и зазберовала красне число школярох. Подобно як цо то влонї посцигнуте у Суботици, Одбор за образованє Националного совиту Руснацох уж обецал потримовку и фахову помоц же би ше то од шлїдуюцого школского року  зисцело и у городзе на побережю Сави. З оживйованьом рускей бешеди, вихова ше и подзвигнє нова ґенерация митровицких Руснацох, хтора нас єдного дня, дай Боже здравя, привита и на трецей Централней преслави у тим городзе.

ПОВЯЗАНИ ТЕКСТИ