ВЕРБАС – На Площи Николи Пашича у Вербаше вчера, 6. фебруара на 18 годзин позберало ше вельке число гражданох на другим сходу котри зволал Глас студентох Вербас як потримовку студентом у блокади.
Як и прешлого тижня на протестним шейтаню, главна парола була „Най и Вербас достанє точкасти софтвер”, а провадзаци слоґани „Гало, чуєме ше?” и „З мешаци 3 круги.”
Мирне протестне шейтанє рушело зоз главней городскей площи, през Маршала Тита по Улїцу Ґустава Крклеца, потим през тоту улїчку по Улїчку народного фронту, и од тей улїчки по Иве Лоле Рибара, дзе ознова протестна колона скруцела до Маршала Тита. У мирним шейтаню шицки обишли три круги, котри символично представяю три мешаци кельо прешло од нєщесца на Желєзнїцкей станїци у Новим Садзе.
Протестне шейтанє було провадзене зоз державнима заставами, численима транспарентами, запалєнима шветлами на телефонох…
Протестне шейтанє прешло мирно.
